e bike: ప్ర‌స్తుతం ఇంధ‌నం ధ‌ర‌లు పెర‌గడంతోపాటు వాతావ‌ర‌ణ కాలుష్యాన్ని నియంత్రించేందుకు కేంద్ర ప్ర‌భుత్వం అడుగులు వేస్తోంది. విద్యుత్ వాహనాల త‌యారీ రంగాన్ని ప్రోత్స‌హిస్తోంది. ఇందుకోసం ఎల‌క్ట్రిక్ వాహ‌నాల కొనుగోలుదారుల‌కు స‌బ్బిడీ ఇచ్చి ప్రోత్స‌హిస్తోంది. ఇప్ప‌టికే ఫేమ్ -2 ప‌థ‌కం ద్వారా స‌బ్సిడీ అందిస్తుండ‌గా దీని గ‌డువు మార్చి 31తో ముగియ‌నుంది. కాగా మ‌రో కొత్త ప‌థ‌కానికి కేంద్రం శ్రీకారం చుట్టింది. ఏప్రిల్ 1 నుంచి జూలై 31 వ‌ర‌కు ఈ కొత్త ప‌థ‌కం వ‌ర్తించ‌నుంది. ఈ కొత్త ప‌థ‌కం అమ‌లు కోసం భారీ ప‌రిశ్ర‌మ‌ల మంత్రిత్వ శాఖ రూ.500 కోట్ల‌తో కేటాయించింది. 

ఈ ప‌థ‌కం ప్ర‌కారం ఎల‌క్ట్రిక్ బైక్‌(e bike) కొనుగోలుకు రూ.10 వేల ఆర్థిక‌ ప్రోత్సాహం అంద‌జేయ‌నుంది. మొత్తం 3.3 ల‌క్ష‌ల ఎల‌క్ట్రిక్ ద్విచ‌క్ర వాహ‌నాల‌ను ఈ ప‌థ‌కం ద్వారా ఇవ్వ‌నుంది. అలాగే ఈ రిక్షా, ఈ కార్ట్ కొనుగోలు కోసం రూ.25 వేల ఆర్థిక ప్రోత్సాహం ఇవ్వ‌నున్న‌ట్లు ప్ర‌క‌టించింది. పెద్ద ఈ త్రీవీల‌ర్ వాహ‌నాల కొనుగోలు చేసేవారికి రూ.50 వేల ఆర్థిక ప్రోత్సాహ‌కం ఇవ్వ‌నుంది. ఇందుకోసం 41 వేల యూనిట్లను ఈ ప‌థ‌కం ద్వారా అంద‌జేయ‌నుంది.  

ఈ మొబిలిటీ (ఎలక్ట్రిక్ వాహనాలు) ప్రోత్సహించేందుకు మోడీ ప్రభుత్వం కృషి చేస్తుందని, ఇందులో భాగంగా ఈ మొబిలిటీ ప్రమోషన్స్ స్కీం 2024 తీసుకొచ్చినట్లు భారీ పరిశ్రమల మంత్రి మహేంద్ర నాథ్ పాండే మీడియాతో తెలిపారు. ఈ ప‌థ‌కం కోసం ఐఐటి రూర్కీతో కేంద్రం అవగాహన ఒప్పందం చేసుకున్న‌ట్లు తెలిపారు. ఎలక్ట్రిక్ వాహనాలు సహా రవాణా రంగం కోసం సెంటర్ ఆఫ్ ఎక్స‌లెన్స్ ఇండస్ట్రీ యాక్స‌ల‌రేట‌ర్‌ను ఐఐటీ రూర్కీలో ఏర్పాటు చేస్తున్నట్లు కేంద్ర ప్రభుత్వం ప్రకటించింది. రాబోయే రోజుల్లో ఈ మొబిలిటీ రంగం మ‌రింత బ‌ల‌ప‌డే అవ‌కాశం ఉంది.