తెలంగాణ ఉద్యమ సమయంలో మానుకోటలో కాల్పులు జ‌రిపిన‌ చరిత్ర మరిచావా? 
ఆర్ఎస్‌పీకి మంత్రి తక్షణమే బహిరంగ క్షమాపణ చెప్పాలి

Itikala Ambedkar: మేడ్చ‌ల్ మ‌ల్కాజిగిరి జిల్లా ప్ర‌తినిధి, క్విక్‌టుడే : బీఎస్పీ చీఫ్ ఆర్ఎ.స్‌. ప్రవీణ్ కుమార్ పై మంత్రి కొండా సురేఖ చేసిన వ్యాఖ్యలను ఖండిస్తున్నామని ఆయ‌నను విమర్శించే స్థాయి మంత్రికి లేదని మేడ్చ‌ల్ మ‌ల్కాజిగిరి జిల్లా అధ్య‌క్షుడు ఇటికాల అంబేడ్క‌ర్ అన్నారు. గురువారం ఆయ‌న జిల్లా పార్టీ కార్యాలయంలో నిర్వహించిన అత్యవసర మీడియా సమావేశంలో ఆయ‌న మాట్లాడారు. కొండా సురేఖ తెలంగాణ ద్రోహి ఆని తెలంగాణ ఉద్యమ సమయంలో తెలంగాణ ప్రజలపైన మానుకోటలో రాళ్ల దాడి చేసి కాల్పులు జరిపిన చరిత్ర కొండా దంపతులదని అన్నారు. ఆర్ఎస్ ప్రవీణ్ కుమార్ పై అహంకార పూరితంగా మాట్లాడాడాన్ని తీవ్రంగా ఖండిస్తున్నామని అన్నారు.

బహుజన్ సమాజ్ పార్టీ రౌడీల పార్టీ, గుండాల పార్టీ అని పేర్కొనడం ఆర్ఎస్ ప్రవీణ్ కుమార్ ఒక రౌడీల అసాంఘిక శక్తులను పెంచి పోషిస్తున్నారని అభ్యంతరకర పదజాలంతో దూషించడాన్ని తీవ్రంగా ఖండించారు. ఎవరు రౌడీ నో ఎవరు ప్రజల మనిషినో తెలంగాణ సమాజనికి తెలుసనీ అన్నారు. మంత్రి అహంకారపూరిత వ్యాఖ్యలతో బహుజన వర్గాల్లో తీవ్రమైన భావోద్వేగం రగిలిందని ఈ వ్యాఖ్యల్ని బేషరతుగా ఉపసంహరించుకోవాలని లేదంటే తగిన మూల్యం చెల్లించుకోక తప్పదని హెచ్చరించారు.
బహుజన నాయకుడు మచ్చలేని మనిషి ఆర్ఎస్ ప్రవీణ్ కుమార్ లాంటి గొప్ప నాయకుని పై అవాకులు చవాకులు మాట్లాడే ముందు తన గతం గుర్తు తెచ్చుకోవాలన్నారు.

గతంలో వైఎస్ఆర్ కాంగ్రెస్ పార్టీ చుట్టూ చేసిన ప్రదక్షిణలు, బీఆర్ఎస్ పార్టీ అధినేత కెసిఆర్ ఇంటిముందు పడిగాపులు కాసిన రోజులు మంత్రి కొండా సురేఖ మరిచిపోయారని ఎద్దేవా చేశారు. అదేవిధంగా బహుజన మేధావులం అని చెప్పుకుంటున్న మాజీ కలెక్టర్ ఆకునూరి మురళి, ధర్మసమాజ్ పార్టీ అధినేత విషారాధన్ మహారాజ్ ఇరువురు ఆర్ఎస్ ప్రవీణ్ కుమార్ పై తమ అక్కసును వెళ్ళగక్కుతున్నార‌ని అన్నారు.  ఎన్నో సందర్భాల్లో మీడియా ముఖంగా కలిసి పనిచేద్దామని ఆర్ఎస్పీ పిలుపునిస్తే దానిని మరిచి ఎవరికి నచ్చిన దారిలో వారు అంటకాగి నేడు ఆర్ఎస్పీని విమర్శించడం సిగ్గుచేటని దుయ్యబట్టారు. ఆర్ఎస్ ప్రవీణ్ కుమార్ కు వస్తున్న ఆదరణను తట్టుకోలేక ఈర్ష భావంతో ఆకునూరి మురళి, విశారదన్ మహారాజ్ లు అసత్య ఆరోపణలు చేస్తున్నారని ఆరోపించారు. ఆర్ఎస్పీ ఒక్కరు కాదని కోట్ల మంది బహుజనల ఆరాధ్య నాయకుడని ఆర్ఎస్పీ గురించి మాట్లాడేటప్పుడు ఒళ్ళు దగ్గర పెట్టుకోవాలని హెచ్చరించారు.