తొర్రూరు ఏప్రిల్ 22:- జాగ్రత్తలతోనే వడదెబ్బ నుంచి రక్షణ పొందవచ్చని డీఎం హెచ్ఓ భూక్య రవి రాథోడ్ అన్నారు. మంగళవారం డివిజన్ కేంద్రంలోని ప్రభుత్వ ఆసుపత్రిని జిల్లా వైద్యాధికారి తనిఖీ చేశారు. రిజిస్టర్లు, రికార్డులు పరిశీలించి సిబ్బందికి సూచనలు చేశారు. ఈ సందర్భంగా డిఎంహెచ్వో మాట్లాడుతూ......వడదెబ్బ తాకిన వారికి జిల్లాలోని అన్ని ప్రభుత్వ ఆసుపత్రుల్లో తగిన వైద్యం అందించేందుకు అన్ని రకాల మందులు అందుబాటులో ఉన్నాయన్నారు. ఓ ఆర్ ఎస్ ద్రావణాలు ప్రతి ఆసుపత్రిలో అందుబాటులో ఉన్నాయన్నారు. వడదెబ్బ బారిన పడగానే చికిత్స అందించాల్సిన అవసరం ఉందని, ప్రభుత్వ ఆసుపత్రుల్లో అన్ని రకాల వైద్య సేవలు అందుబాటులో ఉన్నాయన్నారు. తీవ్రంగా ఎండలు ఉన్న సమయంలో బాలింతలు , చిన్నారులు, వృద్ధులు బయటకు వెళ్ళవద్దని సూచించారు.ఆరోగ్య సిబ్బంది విధులకు విధిగా హాజరుకావాలని సూచించారు. వైద్యులు సమయపాలన పాటించాలని తెలిపారు. జాతీయ ఆరోగ్య మిషన్ లక్ష్యాలను అధిగమించేలా అందరూ కష్టపడి పని చేయాలన్నారు.ట్రూ నాట్ మిషన్లను పరిశీలించి దానికి సంబంధించిన సామాగ్రిని వెంటనే కొనుగోలు చేయాలని వైద్యాధికారి జ్వలితను ఆదేశించారు. ఈ కార్యక్రమంలో మెడికల్ ఆఫీసర్ డాక్టర్ జ్వలిత, వైద్యులు మీరాజ్ ప్రియాంక, నందన, కమ్యూనిటీ హెల్త్ ఆఫీసర్ కుసుమ విద్యాసాగర్, డిపిఎమ్ఓ వనాకర్ రెడ్డి తదితరులు పాల్గొన్నారు.