రోజులు మారినంత ఈజీగా పార్టీలు మారుతున్నారు. ఇవాళ ఒక పార్టీలో ఉన్న నేత.. రేపు ఏ పార్టీలో ఉంటాడో కూడా తెలియడం లేదు. అలా ఉన్నాయి రాజకీయాలు. తాజాగా మాజీ క్రికెటర్ అంబటి రాయుడు కూడా జనసేనకే జై కొట్టేశాడు. క్రికెట్ కెరీర్ కు గుడ్ బై చెప్పిన అంబటి రాయుడు.. వైసీపీ పార్టీలో చేరారు. వైసీపీ నుంచి ఏదైనా నియోజకవర్గం నుంచి పోటీ చేస్తారనే వార్తలు కూడా వచ్చాయి.
అయితే.. అంబటి రాయుడు గుంటూరు నుంచి లోక్ సభ అభ్యర్థిగా పోటీ చేయాలని భావించినట్టు తెలుస్తోంది. ఆయన గుంటూరు టికెట్ ను ఆశించారని వార్తలు వచ్చాయి. ఆ తర్వాత ఏమైందో తెలియదు కానీ.. ఎన్నికల వేళ సడెన్ గా తన నిర్ణయాన్ని మార్చుకొని జనసేన వైపు మళ్లారు. జనసేన అధినేత పవన్ కళ్యాణ్ ను కలిసిన అంబటి రాయుడు.. ఆ పార్టీలో చేరేందుకు సుముఖత చూపించినట్టు అర్థం అయింది కానీ.. ఆ పార్టీలో మాత్రం చేరలేదు.
Ambati Rayudu – Pawan Kalyan : స్టార్ క్యాంపెయినర్ జాబితాలో అంబటి పేరు
కట్ చేస్తే.. జనసేన పార్టీ తాజాగా విడుదల చేసిన స్టార్ క్యాంపెయినర్ల జాబితాలో అంబటి రాయుడు పేరు ఉంది. ఆంధ్రప్రదేశ్ అసెంబ్లీ, పార్లమెంట్ ఎన్నికల్లో జనసేన పార్టీ అభ్యర్థుల పక్షాన ఎన్నికల ప్రచారం చేయడానికి స్టార్ క్యాంపెయినర్లను పార్టీ అధ్యక్షులు పవన్ కళ్యాణ్ నియమించారని.. ఆ పార్టీ రాష్ట్ర ప్రధాన కార్యదర్శి కొణిదెల నాగబాబు, అంబటి రాయుడు (క్రికెటర్), కొరియోగ్రాఫర్ జానీ మాస్టర్, సినీ, టీవీ నటులు సాగర్, పృథ్వీ, హైపర్ ఆది, గెటప్ శ్రీను స్టార్ క్యాంపెయినర్లుగా నియమితులయ్యారని.. జనసేన అధ్యక్షుడికి రాజకీయ కార్యదర్శిగా ఉన్న పి. హరిప్రసాద్ పేరుతో జనసేన ఓ ప్రకటనను విడుదల చేసింది.
అంటే.. వైసీపీ నుంచి అంబటి రాయుడుకు స్పష్టమైన హామీ రాలేదనే టాక్ వినిపిస్తోంది. గుంటూరు నుంచి ఇప్పటికే చాలామంది వైసీపీ నుంచి వెయిటింగ్ లో ఉండటంతో నిన్న కాక మొన్న పార్టీలో చేరిన అంబటికి టికెట్ ఎలా ఇస్తారు అనే వార్తలు వినిపించాయి. దీంతో అంబటికి సీన్ అర్థం అయి.. వెంటనే పార్టీలో చేరిన పది రోజులకే ఆ పార్టీకి షాక్ ఇచ్చి జనసేన వైపు మళ్లారు.
ఈసందర్భంగా పవన్ తో భేటీ అయ్యారు. కానీ.. పార్టీలో చేరకున్నా జనసేన తరుపున స్టార్ క్యాంపెయినర్ గా అంబటి రాయుడికి స్థానం దక్కింది. అలాగే.. పవన్ అన్నను సీఎం చేయడానికి సిద్ధం. కలిసి సాధిద్ధాం అంటూ అంబటి రాయుడు బుధవారం రాత్రి ఓ ట్వీట్ చేశారు.
నిజానికి.. వైసీపీ నుంచి బయటికి వచ్చిన తర్వాత అంతర్జాతీయ టీ20 లీగ్ కు ప్రాతినిధ్యం వహించాల్సి ఉంది కాబట్టి రాజకీయాలకు కొన్నేళ్ల పాటు విరామం ఇస్తున్నా అని చెప్పిన అంబటి రాయుడు.. ఇప్పుడు జనసేన స్టార్ క్యాంపెయినర్ గా నియమితులు కావడంతో క్రికెట్ కెరీర్ కు పూర్తిగా గుడ్ బై చెప్పేస్తారా? జనసేనలో కంటిన్యూ అవుతారా? ఒకవేళ జనసేన అధికారంలోకి వస్తే.. అంబటికి ఏదైనా పదవి వస్తుందా? అనేది తెలియాలంటే ఇంకొన్ని రోజులు వెయిట్ చేయాల్సిందే.
